Davao City – Andam na ang 18 ka mga eskwelahan sa Davao Region human sa paghatag og ‘go signal’ alang sa limited face-to-face (F2F) classes partikular sa mga lugar nga minimal lamang ang risgo sa Coronavirus Disease 2019 (COVID-19).
Atol sa One Davao on COVID-19 Virtual Presser, gibutyag ni Jenielito Atillo, Spokesperson sa Department of Education (DepEd)-XI, nga sa 18 ka mga pampublikong eskwelahan, pito (7) niini nahimutang sa usa ka probinsya, laing pito (7) sa usa ka syudad ug ang nahibiling upat (4) nahimutang sa usa pa ka probinsya sa rehiyon, diin dili pa niini mapanganlan ang mga eskwelahan.
Sumala ni Atillo nga ang mga eskwelahan miagi sa makuting proseso diin adunay guidelines nga istriktong sundon labi na sa pagpatuman sa minimum public health standards batok COVID-19, diin kini nanginahanglan usab og suporta sa mga ginikanan ug sa Local Government Unit (LGU) alang sa pagpahigayon niini sulod sa duha ka bulan nga simultaneous nga himuon sa tibuok nasud.
“All of these 18 public schools were identified through a very meticulous process. Kining atong mga napili sa pagkakaron have met the criteria for this particular endeavor (F2F classes) and we really would like to be assured of the shared responsibility on the level sa atong mga ginikanan usab,” sulti ni Atillo.
Giklaro ni Atillo nga anaa gihapon sa mga ginikanan ang pinal nga desisyon kung paapilon ang ilang anak kung sila nahilakip sa maong mga eskwelahan.
Dugang sa DepEd-XI Spokesperson nga first batch pa lamang ang maong 18 ka eskwelahan dinhi sa Davao Region ug posible kining madugangan pa panahon nga maayo ang mahimong resulta sa implementasyon sa limited F2F classes.
RadyoMaN Kirby Manzon
