Davao City – Bisan og wala pay pinal nga desisyon ang national government pinaagi sa Inter-Agency Task Force (IATF) sa pagpahigayon og face-to-face classes, gipangandaman na sa Department of Education (DepEd) ang pagbalik sa klase sa mga eskwelahan ugaling aduna na kini pagtugot.
Sa interbyu sa DXDC RMN Davao kang Jenielito Atillo, DepEd-XI Spokesperson, gibutyag niini nga ilang nasabtan nga adunay pagbawi sa desisyon sa face-to-face classes labi na nga wala pa gyud hingpit nabalik sa normal ang sitwasyon, gani misiaw pa ang mas delikadong variant sa COVID-19 nga nakasulod sa Pilipinas.
“Nasabtan nato nga matagaan na ‘mi og go signal unya pagkahuman bawion unya mubalik napud tapos mausab napud, simply because ang gitan-aw dinhi ang kaayohan para sa tanan – sa kabataan, sa mga magtutudlo ug sa mga school community. Pero bisan pa man ana, nangandam na gyud ‘ming daan nga ipahilona kining face-to-face learning modality pagbalik,” saysay ni Atillo.
Gipasabot ni Atillo nga mahitabo lang usab ang face-to-face classes sa mga lugar nga gamay lamang ang kaso o walay kaso sa COVID-19 partikular kadtong areas ilawom sa Modified General Community Quarantine (MGCQ).
Ugaling kini mahitabo, kinahanglan usab nga masiguro ang ‘shared commitment’ ug responsibilidad tali sa DepEd, Local Governement Unit (LGU), mga ginikanan ug uban pang sektor sa komunidad alang niini.
Giklaro usab sa tigpamaba sa DepEd-XI nga bisan pa man og gitugtan na ang usa ka eskwelahan alang sa face-to-face classes, anaa gihapon sa kamot sa mga ginikanan ang pinal nga desisyon kung tugotan niini ang ilang anak alang sa in-person learning.
“Bisan pa man og kini nga lugar natagaan og go signal o green light para mag face-to-face, kini nga eskwelahan pero ang ginikanan dili gusto, dili ‘mi mamugos. Kung ang LGU dili gusto, dili pud ‘mi mamugos,” tataw ni Atillo.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
