Davao City – Giklaro sa Department of Education (DepEd)-XI nga dili mamahimong dakong problema ang pagkawala sa internet panahon sa online classes pagsugod sa abri-klase karong October 5, 2020.
Sa interbyu sa DXDC RMN Davao kang Jenielito Atillo, Spokesperson sa DepEd-XI, gibutyag niini nga gawas sa online classes, tanang mga estudyante nagbaton sa ilang tagsa-tagsa ka mga module rason nga mapadayon gihapon ang ilang pagtuon oras nga mohinay o mawala ang koneksyon sa internet.
“Buot nato’ng ipasabot, we do not only cling to the internet or the online scheme using the internet facility. Ang atong online classes naa gihapon na siyay modules,” tataw ni Atillo.
Gipasabot ni Atillo, kabahin gihapon ang modules niadtong mga mipili sa online modality sa abri-klase rason nga walay masayang nga oras sa posibilidad nga magbaton og problema sa internet connectivity.
Dugang sa DepEd-XI Spokesperson, ang modules maoy magsilbing talamdan sa usa ka estudyante aron aduna gihapoy mga aktibidad nga iyang matubag bisan og walay internet connection.
RadyoMaN Kirby Manzon
