Suma ni DepEd XI Spokesperson Jenelito “Dodong” Atillo nga usa ka maayong lakang ang gihimo karon sa senado gumikan napanahon ang pagduso sa maong balaudnon kay pinaagi niini ma-address gilayon ang psychological problem kon health problem nga masinati sa ilang mga estudyante.
Ubos sa naasoy nga balaud, gimandaran ang DepEd sa pagmuntar og Mental Health and Well-Being Center ug butangan og lisensiyadong guidance counselor ug psychometrician nga dunay tugbang sweldo sa Grade 16.
Nabalaka si Senador Gatchalian sa padayon nga naagian nga psychological problem sa mga kabataan karon rason sa pagpakamatay sa pipila sama sa nahitabo sa usa ka senior high student sa usa ka iladong tulunghaan sa siyudad niadtong miaging mga semana.
Subay sa datos, sa 3.5 ka Pilipino ang nagsagubang og mental problem diin pinakataas kini nga kaso itandi sa mga silingang nasud sa Asya apan subo kay 5 porsento lang ang gi-alokar nga pondo sa gobyerno alang sa psychological intervention.
Giingon sa tigpamaba nga bisan tuod gipanday pa ang nasampit nga balaud, ang DepEd mihimo na og lakang pinaagi sa pagbutang og guidance counselor sa mga eskwelahan kay dinha maayudahan dayon ang estudyante sa gikinahanglang niini nga psychological intervention.
Gitindugan sa opisyal nga magsugod ang lig-on nga sikolohiya ug emosyonal nga aspeto sa mga kabataan dinha sulod sa panimalay sanglit ang mga ginikanan man ang unang tigmatuto ug ikaduha lang ang sa eskwelahan.
Busa gidasig ni Atillo ang mga ginikanan nga tabangan ang ilang mga kabataan nga makabarog nga lig-on dinha sa hisgutanang pyschological ug emotional nga aspeto aron malikayan ang depresyon ug pagsuicide sa ilang mga anak.
RadyoMaN Joel Viray
