Davao City – Mas aduna sumala pay angay tutukan nga problema ang Department of Education (DepEd) gawas sa sugyot balaodnon nga giduso sa usa ka kongresista nga sugdan ang klase sa mga tulunghaan alas-8:30 sa buntag.
Sa interbyu sa DXDC RMN Davao kang Jenielito Atillo, spokesperson sa DepEd-XI, gibutyag niini nga abri ang departamento sa mga sugyot sa pag-improbar sa sistema sa edukasyon apan mas maayong matutukan una ang kasamtangang problema sama sa konstruksyon sa mga ‘school buildings’ ingon man taas nga populasyon sa mga tulunghaan.
“Sa kasamtangan, while we welcome the position of the honorable congressman, mura’g ang reyalidad on the ground will not see that accepting because simply of the fact nga duna gyoy dapat natong i-address nga kahimtang o sitwasyon kabahin niini,” saysay ni Atillo.
Pagpasabot ni Atillo nga kung dugay nga masugdan ang klase, posibleng dugay usab kining mahuman tungod kay adunay usay oras nga gitagana sa matag subject o rekisitos nga gipangayo niini.
Hinuon, girespito sa departamento ang maong sugyot ug sayud kini nga muagi pa kini sa lawom nga pagtuon ingon man pagsuta sa mga epekto niini diha sa sistema sa edukasyon.
RadyoMaN Kirby Manzon
