DepEd-XI: ‘Tara, Basa! Tutoring Program’ I-monitor

Davao City – Pormal na nga gilusad sa Department of Social Welfare and Development (DSWD) ang ‘Tara, Basa! Tutoring Program’ didto sa kauluhan niadtong Agosto 2, 2023 sa tinguha nga makatunol og pinansyal nga tabang sa mga estudyante sa kolehiyo nga anaa sa kapit-os ug labaw sa tanan, makatabang sa mga estudyante sa elementarya nga naga lisod pa og basa.

Alayon niini, gipasibaw ni Department of Education (DepEd)-XI spokesperson Jenielito Atillo ang iyang reaksyon mahitungod sa maong programa atol sa Straight to the Point (STP) Morning Edition, kauban si RadyoMan June Duterte, Miyerkules, Agosto 9, 2023.

Sumala pa niya nga maayo man ang tumong sa ‘Tara, Basa! Tutoring Program’ apan adunay daghang bantayan ug ikonsidera.

“Kailangan mamonitor ‘ni og maayo sa DepEd kay dili man gud basta basta ang atong pagtudlo, labi na when it comes to reading. Naay proseso sa pagtudlo. So I hope nga naplastar na ni daan because the ones will be teaching are non-teachers.” tipik sa iyang pamahayag.

Ang ‘Tara Basa Tutoring Program’ usa ka holistic social welfare and development model diin ang college students ang natahasang mamahimong tutor ug youth development worker. Gawas sa pagtudlo sa mga bata nga naglisod o dili pa kabasa, gipakusgan sab sa programa ang parenting session alang sa mga ginikanan aron mamahimong “Nanay-Tatay Teacher” nga maoy unang mga magtutudlo sa panimalay.

RadyoMaN Ivy Parido