DepEd XI wala pa’y desisyon kon ipatuman ba ang no social distancing ug no facemask atol sa graduation ceremony

Davao City – Giklaro karon sa Department of Education Davao Region nga dili mandatory ang kamandoan sa DEPED National Office labot sa ‘no facemask ug no social distancing’ atol unya sa mga graduation ceremony sa mga pampublikong tulonghaan sa nasud.

Gitin-aw ni DepEd XI Spokesperson Dodong Atillo, base sa DepEd Circular No.009 series of 2023, nga dili pugsanay kon wad-on ba o dili ang pagsuot og face mask ug pagobserbar sa social distancing alang sa mahitabo unyang graduation ceremony sa pampublikong eskwelahan sa entero nasud.

Matud ni Atillo, naka-stipulate sa ikaduhang kamandoan adunay kagawasan ang mga rehiyonal nga buhatan sa pagdesisyon kon wala-on ba o dili ang dili pagsuot og facemask ug wa na’y distansiyahanay sa mga graduation rites diin magdepende gihapon ang tanan sa posisyon sa ilang Regional Director.

Hangtud karon wala pa matuki sa regional level ang circular #009 series of 2023 sanglit gikinahanglan pa suhiron ang mga Division Superintendent alang sa ilang kumento ug opinyon una makakab-ot adiser makadesisyon ang rehiyonal nga buhatan kabahin niini.

Gibatbat sa kanhi broadcaster, ang usa sa basehan aron mahitabo ang no wearing of facemask ug no social distancing mao ang dagan sa kaso sa COVID-19 nga natala sa partikular nga tulunghaan ug sa komunidad. Hinoon layo pa ang seremonya sa graduation aron tukion ang kamandoan sa DepEd Central Office.

Nasuta, ang closing exercise ug closing ceremony mahitabo pa karong July 7, 2023 ug sa July 14, 2023 matapos ang school year 2022-2023.

RadyoMaN Joel Viray