Davao City – Dulot sa bukog ang kasuko karon sa usa ka inahan sa iyang
kapuyo nga si Randy Cadiente kay matud pa nakaako kini sa pagsunog sa
kaugalingon nilang tres anyos nga anak nga si alyas Inday.
Nahitabo ang mangilngig nga krimen sa ilang balay mismo sa may Malagamot
Panacan sa miaging gabii.
Apan hugot gilimod ni Randy ang pasangil ug depensa niini nga posibli
nakab-ot sa bata ang lampara nga nagpatong sa lamesa sa ilang balay.
Apan ang testigo nga si Leonardo Abli nagsulti nga gidabdaban sa amahan ang
bata ug gani ang mga otoridad nakarekober og container sa gas ug lighter sa
crime scene.
Sumala ni Gheena Agtas, usa ka professional counselor, nga posible
naghambin og dakong suliran ug depression ang suspek kun man ugaling tinood
nga iyang gisunog ang iyang anak.
Nasayran nga duha na ka tuig buwag sa kapuyo si Randy nunot sa iyang
pagkadagmalan ug katapulan.
Gibati og kasubo si Agtas sa kahimtang sa hut-ong sa mga batan-on karon
kinsa bulnerable sa abuso sa kaugalingong pamilya o dili ba kaha malambigit
sa krimen mismo sama sa nadangatan ni alyas Inday nga giingong napahungawan
sa kasuko sa amahan sa iyang inahan.
Si Dr. Ermela Deposa, KTSFI Master of Arts in Counseling Program
Coordinator, nagyagyag sa pipila ka senyales sa tawong dunay depression
sama sa paghambin og suliran ug paghimo sa mangilngig nga krimen.
Si Deposa nagtoo nga ang nagtukmod kang Randy aron sunugon ang
kaugalingong anak mao ang nasinatian niini nga depression nunot sa
pagkabuwag nila sa iyang kapuyo.
Busa gibati og kabalaka si Agtas sa kasamtangang sitwasyon sa mga bata
karon nga kun dili ma-edukar ang mga ginikanan sa pagsulbad sa ilang mga
problema hayan daghan pa ang sama ni alyas Inday mapa-gan sa away sa mga
ginikanan.
Gidasig ni Agtas ang kadtong magtrato ug nag-plano magminyo na nga una sila
hingpit musulod sa altar sa kaminyoon, muagi una sila sa social awareness
seminar aron ilang masayran ang sakto nga pagdala sa problema ug pagsulbad
niini sa ingon wala nay anak makahiagom sa mangilngig nga krimen.
RadyoMaN Joel Viray
