Deputy checker sa PENRO Zamboanga del Sur, patay sa pagpamusil

71

Labangan, Zamboanga del Sur – Patay diha-diha ang usa ka empleyado sa provincial government human kini gipusil sa riding in tandem dihang dapita sa national highway, Brgy. Tawagan Norte, Labangan, Zamboanga del Sur ala 1:00 kagapon sa hapon.
Naila ang biktima nga si Darwin Lacerna Adamos, 33 anyos, residente sa nasangpit nga barangay ug deputy checker sa Provincial Environment and Natural Resources Office. Nakaangkon og daghang samad pinusilan ang biktima sa lain-laing parte sa iyang lawas nga maoy hinungdan sa hinanaling kamatayon sa biktima. Samtang mikalagiw ang mga suspetsado paingon sa sentro sa Labangan sakay sa ilang motorsiklo.
Sumala sa inisyal nga imbestigasyon sa Labangan Municipal Police, kalibre 45 nga pistola ang gigamit sa pagpamusil sa biktima basi sa ebidensya nga narekuber sa dapit-hitaboan. Giturn-over na sa pamilya ang patay nga lawas sa biktima ug gipahiluna na sa Gamalinda Funeral Homes. Naghimo na karon ug hot pursuit operation ang kapulisan aron pagtugis sa mga suspetsado.

Facebook Comments