Destination signages gihangyo sa SP ngadto sa DPWH

24

GIPALABANG sa 26th Sangguniang Panlalawigan ang usa ka resolusyon nga maghangyo sa Department of Public Works and Highways (DPWH) Regional Office X, pinaagi kang Regional Director Zenaida T. Tan nga magbutang sa destination signages diha sa entrada sa Malaybalay City Bypass Road padulong ug gikan sa Barangay San Jose ug Barangay Dalwangan, syudad sa Malaybalay, Bukidnon.

Sa mosyon ni Board Member Nemesio B. Beltran, Jr. alang sa Resolution No. 2021-2065(26th SP), gipasabot niini nga ang mga signages sa padulnganan mamahimong giya ug maghatag alerto sa mga drayber sa tinguha nga mahimong hapsay ang pagbiyahe pinaagi sa pagpahibalo sa ensaktong linya, ang kalay-on o distansya, direksyon ug alternatibong mga ruta.


Samtang sa gihimong ika-72 nga Regular Session sa SP niadtong Enero 5, 2021, personal na nga napaabot sa mga miyembro sa SP ang maong hangyo ngadto sa mga personahe gikan sa DPWH sa panglantaw nga magiyahan ang mga motorista sa ilang pagbiyahe, ilabi na kay bag-ong bukas ang maong bypass road, niadto lang Nobyembre 27, 2020.

Gibutyag ni Board Member Beltran, nga ang nasangpit nga bypass road mao na ang gitakda nga agi-an sa mga dagkong truck nga moagi sa highway sa syudad sa Malaybalay. Alayon niini, gipaabot sa kapulisan sa syudad sa Malaybalay nga maka-palabang ug ordinansa ang syudad sa Malaybalay kalabut sa mamahimong gamit sa maong bypass road aron hingpit magiyahan ang mga drayber sa dagkong truck sa dalan nga angayan nilang agi-an pag-abot dinhi sa syudad sa Malaybalay.

Facebook Comments