Posiblemente hay subi pa mas de cingcuenta milyones de pesos el destroso na mga product agricultural y fisheries aqui na entero ciudad de Zamboanga.
Este el revelasccion del City Agriculturist Diosdado Palacat amediante que ta continua pa el su oficina el conducta del post calamity assessment del mga barangay afectao na calamidad de avenida que ya pasa na ciudad.
Asegun con el Palacat na entrevista del RMN Zamboanga, que el cosa sila ya reporta ayer con el CDRRMO inisyal pa lang y aura mas ta omenta este valor del destroso cay ta rehistra Tambien el assessment del losdemas mga barangay que ya atrasa sumite el destroso na mga product agricultural y fishery products na ciudad.
Presentamente, 1,150 siembrador pa lang el ya rehistra na oficina de Palacat que afectao del Avenida, donde chene 310 hectarya de sementera sumido y destrosao, 477 hectarya del maisan, 144 hectarya de gulayan, 200 hectarya de agar-agar, 857 hectarya del mga fishponds ya man wash-out na Avenida conP30 milyones valor del irigasyon.
Si Palacat ya abla cay este dia, hay man junta ele con el su mga personajes para fuede conduci el pinal evaluasyon y recomendasyon si cosa-cosa mga equipajes, ayuda y mga semilla que fuede cumpra insiguidas para fuede ayuda conestos mga siembrador y fescador que afectao na calamidad aqui na ciudad. – *Bhong Simbajon/RMN News*
