Karon ang katapusang adlaw para sa Pre-Registration alang niadtong buot mokuha ug Pasaporte dinhi sa dakbayan sa dipolog nga kung diin didto magpalista sa Dipolog city hall sa opisina sa Mayor sa 4th Floor, gitawag kini nga Passport on Wheels.
Nagsugod kini niadtong adlawng Byernes Setyembre 7, 2018 ug matapos kini karong adlawa Setyembre 12, 2018, kagahapon walay opisina, lauman nga karong adlawa mas daghan pa ang mo apas niini nga kahigayonan aron magpalista alang sa passporting.
Mismo ang taga Department of Foreign Affairs (DFA) ang mo anhi diri karong Oktubre 3, 2018 alang sa ilang Passport on Wheels dinhi sa dakbayan sa Dipolog.
Nasayran nga ang City Government of Dipolog sa pagpangulo ni Mayor Darel Dexter T. Uy mihangyo sa DFA nga mopahigayon ug passporting dinhi sa dakbayan aron dili na moadto sa laing siyudad sama sa Dumaguete, Zamboanga, Davao, Cebu, o Manila ang gustong mokuha o mo renew sa ilang mga passports.
Tungod niini ang DFA pinaagi sa Passport On Wheels misanong sa hangyo ni Mayor Uy ug mihatag ug 1,000 ka slots alang sa usa ka adlaw nga pagproseso sa mga aplikante sa passports dinhing dapita karong Oktubre 3 ning tuiga.
Sa susamang kalamboan nakita ni Mayor Uy nga daghang mga Dipolognon ang gustong mokuha pa unta ug passport apan dali ra nga napuno ang listahan alang sa 1,000 ka mga aplikante busa gipaningkamutan karon sa dakbayan nga makapahigayon ug dugang o lain pa nga kalihokan sama niini sa umaabot ug daling panahon.
Ang processing fee alang sa pagkuha ug passport nagkantidad ug Php1,350.00 lakip na niini ang courier fee.
