Ipinamalas ng Urdaneta Sacred Heart Hospital ang patuloy nitong pangunguna sa serbisyong pangkalusugan matapos basbasan ang pinalawak nitong Dialysis Center noong Enero 11. Sa naturang pagpapalawak, tumaas ang kapasidad ng pasilidad mula 40 hanggang 60 dialysis machines, na itinuturing ngayon bilang isa sa pinakamalaki at pinaka-komprehensibong dialysis centers sa Hilagang Luzon.
Layunin ng proyektong ito na matugunan ang patuloy na pagdami ng mga pasyenteng nangangailangan ng regular na dialysis, hindi lamang mula sa Urdaneta kundi pati na rin sa mga karatig-lalawigan. Sa pagdaragdag ng mga makabagong makina, mas maraming pasyente ang maaaring mapagsilbihan nang mas mabilis at episyente, habang pinananatili ang mataas na pamantayan ng kaligtasan at kalidad ng pangangalaga.
Bukod sa pagdagdag ng mga dialysis machine, isinailalim din sa masusing pagsasaayos ang reception at waiting area ng center. Ginawa itong mas maluwag, mas komportable, at mas kaaya-aya para sa mga pasyente at kanilang mga kaanak. Ang bagong disenyo ay nakatuon sa pagbibigay ng mas maayos na karanasan, lalo na’t ang dialysis ay isang pangmatagalang gamutan na nangangailangan ng regular na pagbisita sa ospital.
Ayon sa pamunuan ng ospital, ang pagpapalawak na ito ay bahagi ng kanilang mas malawak na adbokasiya na maghatid ng makatao, episyente, at world-class na serbisyong medikal. Sa patuloy na pag-iinvest sa modernong pasilidad at pasilidad para sa kaginhawaan ng pasyente, pinagtitibay ng Urdaneta Sacred Heart Hospital ang kanilang papel bilang isa sa mga haligi ng pangangalagang pangkalusugan sa rehiyon.
Sa pagbubukas ng mas pinalawak at pinahusay na Dialysis Center, inaasahang mas marami pang buhay ang matutulungan at mas mapapabuti ang kalidad ng pangangalaga para sa mga pasyenteng may sakit sa bato sa Hilagang Luzon. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
