Sa interview sa DXDC RMN Davao kang Engineer Albert Gabriel, CyberSecurity Focal sa DICT-XI, iyang gibutyag nga tulo ka nag-unang rason sa cyberattack mao ang cybersecurity policy o palisiya sa kung kinsa lang otorisado sa paggamit sa sistema. Ikaduha mao ang gibutang nga technology sama nalang kung dili updated, wala na-renew ang subscription sa firewall. Ikatulo mao ang human factor o wala saktong natuman sa mga indibidwal ang pagpadagan sa sistema.
Alang sa publiko, kinahanglan usab nga mag-igmat kanunay tungod kay risgo usab sa cyberattack kung dili mabantayan ang paggamit sa gadgets.
“Kinahanglan gyud nga mag-igmat gyud sila (ang katawhan). Dili dayon ta mutuo sa mga messages. Dili dayon ta mutuo sa mga email nga nagaabot sa atoa ilabi na og wala ta kaila kung asa gikan. Dili ta basta-bata mo-click og mga link nga wala ta kabalo kung asa na nga mga link,” pahimangno ni Gabriel.
Pipila ka mga government website ang nabiktima sa cyberattack mao ang Philippine Health Insurance Corporation (PhilHealth), ug ang Philippine Statistics Authority (PSA), diin padayon usab kining giimbestigahan.
RadyoMaN Kirby Manzon
