Davao City – Dako og tabang ang pagpatuman sa unified digital vaccination certificate diin apil ang syudad sa Davao sa pilot test niini.
Sa anunsyo ni Davao City Mayor Sara Duterte-Carpio sa iyang official Facebook page, gibutyag niini nga nahilakip ang Davao City sa ikaduhang pilot sa vaccination certificate, diin sa pagkakaron, padayon ang koordinasyon sa Davao City Information Technology Center (CITC) ngadto sa Department of Information and Communications Technology (DICT) labot niini.
“Naay second pilot ang Vax Certificate and apil ang Davao City. Ang atong City Information Technology Center (CITC) is working with the Department of Information and Communications Technology (DICT) for this,” sulti sa mayor.
Matud sa alkalde, ang maong digital vaccine certificate maoy solusyon sa pagpanggawas sa mga peke nga vaccination card diin nasayrang kini adunay unique nine-digit number isip numero sa Certificate ID.
Gawas niini, aduna usab kini personal nga impormasyon ug vaccination status sa usa ka indibidwal, kung kini naka-first dose o fully vaccinated na batok Coronavirus Disease 2019 (COVID-19).
Una nang gi-launch ang VaxCertPH sa Metro Manila ug Baguio City diin kini available pa sa pagkakaron sa mga Overseas Filipino Workers (OFWs) ug sa mga foreign travelers.
RadyoMaN Kirby Manzon
