Davao City – Buot sa mga tagtungod sa pamilyang Castro nga sila Pilar Ocdenaria ug Delma Castro nga atubangon gayod sa driver sa Mindanao Star bus nga nakabangga patay ang kasong gipasang-at kaniya.
Kagahapong adlawa gipasang-at na sa Digos City Prosecutor’s Office ang kasong reckless imprudence resulting in multiple homicide and damage to property batok kang Fermin Macalos.
Patay ang unom ka mga biktima nga sakay sa pedicab nga sila Joel Castro Jr., drayber, asawa niini nga si Honey Grace Castro, ilahang tulo ka mga anak nga sila Cyril Jake Castro ( 7 anyos), Joana Claire Castro ( 4 anyos), Joel Castro III (2 anyos) ug apuhan sa mga bata ug amahan ni Honey Grace nga si Floro Ocdenaria (57 anyos) nga taga-Miranda Village Barangay Zone III, Sta. Cruz Davao del Sur human naghead on kontra sa bus nga ilahang kasugat sa intersection sa Davao-Cotabato road ug Digos Diversion Road, Brgy. Cogon, Digos City alas 6 pasado sa buntag kagahapong adlawa.
Dugang niini, nanawagan ngadto sa gobyerno ang mga kabanay nga matabangan sila sa pagpahiluna sa mga biktima kinsa gipanghaya na sa Esperanza Funeral Homes Sta Cruz Poblacion, Davao del Sur.
Samtang, ang igsuon sa drayber sa bus nga si Amalia Onggo mipaaabot sa iyang mensahe sa mga pamilya sa mga namatay nga dili lang dumtan ang iyahang manghod ug nanghinaot nga pasayluon nila kini.
RadyoMaN Aimee Guinita
