Davao City – Nagpabilin gihapon pagkuyanap ang korapsyon ubos sa panggobyerno ni Pres. Rodrigo Duterte taliwala sa kampanya sa paglutos sa mga opisyales nga daw sama sa linta nga misipsip sa kaban sa katawhan.
Dili makabilib si Pangulong Duterte bisan pa og iyang gisipa sa katungdanan ang iyang mga sakop sa kabinete tungod hangtud karon daghan pama’y mga kawatan sa ubos sa iyang administrasyon.
Usa sa bug-at nga rason ngano nagpabilin migamot ang ugat sa mga kawatan sa kagamhanan kana gumi-kan sagad sa mga nakalingkod sa puwesto karon naduhig sa kurapsyon sa miaging mga administrasyon.
Kumento ni Magdalo Rep. Gary Alejano nga usa sa rason nganong walay kahadlok ang mga kiriwan sa panghilabot sa kwarta sa katawhan kana tungod walay ni usa nakasohan sa mga gitanggal sa katungdanan.
Ingon pa ni Alejano nga kun buot gayod sa administrasyon putlon ang punuan sa mga kawatan angay palig-unon ang sistema sa lahi-lahi nga mga ahensiya sa gobyerno.
Ug gamitan og pinamangtas nga aksyon ang paggukod sa mga opisyales ug mga empleyado kansang notadong tinghilabot sa bahandi sa katawhan.
RadyoMaN Joel Viray
