Davao City – Wala una gikunsidera karon sa Department of Interior and Local Government (DILG-XI) ang paglusad og imbestigasyon sa mga lokal nga kagamhanan nga nagun-uban nga mga gambalay hatud sa suno-sunod nga kusog nga linog sugod niadtong 16 hangtud 31 niadtong Oktubre.
Sumala ni DILG Regional Director Alex Roldan, mas mahinungdanon alang kaniya ang pagtabang sa katawhan sa mga lungsod ug siyudad sa probinsiya sa Davao del Sur nga naapektohan og maayo sa mga pagtay-og kaysa paghimo og imbestigasyon aron masuta kun substandard ba o dili ang mga gambalay nga gipangtukod sa mga lokal nga kagamhanan.
Gipangatarungan ni Roldan nga mahulog ra siyang insensitibo sa gidangatan sa mga tawo ug sa mga lokal nga kagamhanan kung maghunahuna pa kini og imbestigasyon batok sa mga opisyal sa mga kagamhanang lokal ug sa mga barangay officials.
Dugang punto ni Roldan mao nga walay ekspertong makagarantiya nga kayang mubarog ang mga gambalay nga ilang itukod kung muigo ang kusog nga linog hilabi na nga naga-usab na ang kinaiya sa pag lihok sa kayutaan karong panahona kini subay sa scientific data.
Segun ni Roldan, mas prayoridad nila karon ang pagkoordinar sa nasudnong kagamhanan aron paspasan ang release sa mga ayuda sama sa pagkaon, tubig, gamit pangkatulog, tambal ug uban nga gininahanglan sa mga tawo nga anaa sa mga evacuation centers ug sa mga kalsada aron malikayan ang outbreak sa balatian.
Apan ugaling aduna ma’y tulubagon ang mga kontratista ug mga engineers sa nangahugmak nga mga gambalay, depende na unya kini sa inspection sa mga hingtungdang ahensiya sama sa Department of Public Works and Highways (DPWH).
Hinoon, sa tan-aw ni Roldan, mao na kini ang tukmang panahon aron rebyohon pag-usab ang National Building Code of the Philippines kung kini applicable kun haom pa ba sa Pilipinas hilabi na nga sagad sa mga gihugno sa linog nga mga gambalay kapin duha na ka dekadang natukod.
RadyoMaN Joel Viray
