Davao City – Aminado ang Department of Interior and Local Government (DILG) Davao Region nga lisod gayod makab-ot ang hapsay nga piniliay sa rehiyon karong Mayo 13, 2019.
Sumala ni DILG-XI Regional Director Alex Roldan, subay lamang usab kini sa kasinatian sa nakalabay nga mga bugnong lugaynon diin natala ang mga bayolente nga hitabo sa pipila ka dapit sa rehiyon.
Matud ni Roldan, kung ang usa ka lugar dunay natigayong kaguliyang sa miaging mga piniliay, nan kini nga dapit gubot gihapon pag-abot sa eleksyon tungod sa init nga bangi sa away-politika.
Gibutyag pa ni Roldan nga dinhi sa rehiyon dili matago nga aduna gihapo’y mga politiko ug mga kandidato gikunsiderang armado ug nagbaton og pribadong puwersa nga mupahaling unya sa bayolente nga eleksyon sa Mayo.
Hinoon, wala nganli ni Roldan ang mga lugar apan hugot kining gimonitor aron sa ingon dili makaporma ang mag-alkontrang partido.
Luyo sa talandugon nga sitwasyon sa piniliay upat ka bulan gikan karon, malaumon ang opisyal nga magmalinawon ang tibuok piniliay karong Mayo.
Ug aron mahatagan og katumanan ang damgo ug tinguha sa Comelec-XI nga malinawon ug malampuson ang eleksyon, padayon ang panagpulong sa kapulisan ug militar ug DILG-XI aron i-plastada ang kinatibuk-ang seguridad sa piniliay dinhi sa rehiyon.
RadyoMaN Joel Viray
