Apat na araw bago ang May 13 midterm elections, umapela na sa publiko ang Department of Interior and Local Government o DILG na isumbong sa Commission on Elections , Philippine National Police at National Bureau of Investigation ang anumang vote-buying activities.
Alinsunod ito sa direktiba ng Comelec Task Force Kontra Bigay na pinangungunahan ni Commissioner Al Pareño.
Magkasama sa inter-agency Task Force Kontra Bigay ang Comelec bilang lead agency, DILG, PNP, NBI at Integrated Bar of the Philippines bilang mga miyembro.
Kinumpirma ni DILG Undersecretary at Spokesperson Jonathan Malaya na marami nang ulat ang natatanggap ng Comelec ,PNP at DILG field offices kaugnay sa talamak na vote buying incidents sa maraming lugar sa bansa.
Para matigil ang vote-buying, dapat makiisa ang publiko at tulungan ang gobyerno.
Pinaalalahanan din ng DILG ang publiko na mahigpit na ipinagbabawal ang vote-buying at vote-selling sa ilalim ng Omnibus Election Code .
Aniya, may katapat na kaparusahan na pagkakakulong ng hanggang anim na taon at diskwalipikasyon sa paghawak ng tungkulin sa gobyerno ang sinumang mapatunayang gumawa nito.
