Ginkakibot ni DILG provincial Supervisor Atty. Teodora Sumagaysay ang naguwa nga resulta sang clearing operations sa website sang Department of Interior and Local Government konsa diin nangin adjectival ang rating sang mga LGU.
Suno kay Sumagaysay nga sa ila ginsumiter nga resulta sang validation, numeric ang rating sang mga LGU’s kabangdanan nakibot siya sa naguwa nga resulta nga adjectival ang rating.
Nahibaluan nga base sa ginpaguwa nga resulta sang DILG, gin-rate ang mga LGU’s bilang low , medium kag high compliant base sa numeric rating nga 70-80, 81-90 kag 91-100 suno sa pagpasunod.
Subong man, ginpahayag ni Sumagaysay nga sa naguwa nga resulta, may mga banwa nga mataas ang nakuha nga numeric rating nga yara sa 91-100 apang naguwa sa adjectival rating nga medium compliant lamang.
Bangud sini, luyag ni Sumagaysay nga lantawon kon ano ang natabu kag ano ang balasehan sa pagpaguwa sang nasambit nga rating sang national office sang DILG.
Samtang, ginpanugyan man sini sa mga LGU nga nakakuha sang low compliant rating nga himakasan pa ang pagpatigayon sang clearing operations sa ila natungdan nga mga banwa.
