TACLOBAN CITY – Tapos na an filing han Certificate Of Candidacy para ha tikaarabot nga Barangay ngan Sanguniang Kabataan (SK) Election.
Pira nala ka adlaw in magtitikang na an campaign period ngan an adlaw mismo han eleksyon ha Mayo 14, 2018.
Sumala kan Myles Colasito, Public Information Officer han DILG Region 8 nga kampanya ngan panuyuan han Department of Interior and Local Government ha mga mapipili nga mga opisyalis ilabi na ha Sanguniang Kabataan nga magkamayada hin sakto nga hibaro ugsa lumingkod ha ira mga tagsa-tagsa nga posisyon.
Mahitungod hini, an tanan nga elected SK Officials in required nga mag participate ha mandatory training han DILG ngan National Youth Commission.
Nagpagawas na hin guidelines an DILG durante han implementasyon han SK Mandatory and continuing training program nga pagbubuhaton ha Mayo 17-26.
Panuyuan han DILG nga matutduan an mga mapipili nga mga SK Officials han SK History an pagdumara hin meeting ngan paghimo hin resolusyon, paunanhon an pagbudget, ngan an Code of Conduct ngan ethical standard kumo usa nga public official.
An training fee han kada usa nga SK Official in diri malapos ha P2,000.00 nga kukuhaon ha 10% SK Fund han barangay.
Pahimatngon naman han opisyal, nga pwedi ma disqualify o mapapailarom ha disciplinary action an mga SK Officials nga diri makakaatinder ha training nga waray valid reason.
