Davao City – Padayon karon ang diskusyon og duna pa bay 2nd tranche sa Social Amelioration Program o SAP sa mga gipailawom sa General Community Quarantine o GCQ nunot sa krisis sa COVID-19.
Sa interview sa DXDC RMN Davao kang Department of the Interior and Local Government kun DILG XI Regional Director Alex Roldan, giingon niini nga nasayod sila nga dunay mga ninggula nga hungihong nga di na makadawat og 2nd tranche ang mga lugar nga wala na naka Enhanced Community Quarantine apan gitino niini nga wala pay final guidelines sa nahisgutan.
Sumala ni Roldan nga sa pagkakaron gitahasan ang mga Local Government Units kun LGUs nga andamon gihapon ug i-validate ang mga listahan sa SAP beneficiaries.
“Gipapaandam na nato ni siya kay in case mag 2nd tranche ta malista na daan kinsa tong dapat makadawat ug kinsa tong di makadawat samtang wa pa naghinatagay matarong na ni siya. But ako naa koy feeling nga naay 2nd tranche ani kay padayon pa man ang quarantine,” segun ni Roldan.
Sa karon ginahuman pa sa ubang LGUs ang SAP distribution aron maka-liquidate na diin sa Davao region, anaa na sa 88 % samtang 80-85% na ang status sa distribusyon sa SAP sa Davao City.
RadyoMaN Renz Barbarona
