DILG: Sustained road clearing drive

19

Davao City – Nahuman na niadtong Septyembre 29, 2019 ang deadline sa clearing operation sa mga kadalanan nga gimando sa nasudnong gobyerno diin migawas nga ang Region XI pasado sa gilaumang grado.

Matud ni DILG-XI Regional Director Alex Roldan, ang Davao Region nakakuha og 75% nga passing grade ug labaw kaayo sa gi-ekspektar nga por ciento nga buot ipakab-ot sa nasudnong panggamhanan ngadto sa tanang mga Local Government Units (LGUs).


Sa tibuok rehiyon, ang munisipalidad sa Malalag nakakuha og 95% nga compliance sa paglimpyo sa kadalanan gikan sa mga obstruction sama sa extension sa negosyo, pagparking sa mga sakyanan ug uban pang mga road or street obstructions.

Nagpasabot kini nga paspas misanong ang maong lungsod sa mando ni Pres. Rodrigo Duterte nga bakwion ang mga sidewalk kun mga bangketa gikan sa mga pribadong indibidwal ug aron mapuslan kini pag-usab sa publiko.

Apan ang hometown sa pamuno-nasud nabutang karon sa red flag sanglit miabot ra sa 30% lamang ang clearing operation ug kini layo ra sa ‘accepted passing grade’ sa gobyerno.

Pipila sa rason mao ang wala pag-seryoso sa lokal nga kagamhanan sa mando sa pangulo ug kakulang sa plano, hinonoa gigamit kini aron i-demolisar ang mga kabalayan nga iligal nga gipangtukod, segun ni Roldan.

Mao kini ang rason nganong personal nga gisuta sa mga opisyales gikan sa national government ang aktwal nga implementasyon sa road clearing operation diin human sa pipila ka adlaw nga pagpatuman niini, nakapasar na gayud ang syudad.

Subay niini, gipaklaro ni Roldan nga walay labot sa clearing operation ang ‘right of way’ ug demolisyon apan kadto lamang mga illegal extensions sa pamatigayon ingon man kadtong nagahimo sa illegal parking.

Positibo ang opisyal nga makab-ot ra gihapon sa tibuok rehiyon ang 100% nga road clearing operation enforcement una matapos ang 2019 diin dakung hagit karon sa rehiyonal nga buhatan ang pag-sustiner sa nakuha nga passing grade.

RadyoMaN Joel Viray

Facebook Comments

From Advertisers