Davao City – Kinahanglan nga istriktong i-monitor sa lokal nga panggamhanan ang gimontar nga community pantries pinaagi sa pagbutang og mga regulasyon niini.
Sa interbyu sa DXDC RMN Davao kang Alex Roldan, Department of Interior and Local Government (DILG)-XI Regional Director, gibutyag niini nga kinahanglang masigurado nga safe ang gina-donar nga produkto o luwas kining magamit sa publiko.
Segun ni Roldan nga kinahanglang ma-check ang maong mga produkto sa mga hingtungdang ahensya sa gobyerno sama sa City Health Office (CHO), Food and Drug Administration (FDA) o kaha mga sanitary inspectors.
Kini aron sa pagsigurong ang mga pagkaon dili daot o expired, o bisan sa sitwasyon nga adunay magbinoang sa ibutang nga produkto diha sa community pantries nga posibleng makadaot sa lawas sa tawo.
“Bisan kanang mga gulay dapat kahibalo ‘ta diin na gikan basin puno pud na’g pesticide or unsa. Walay dautan manghatag, mamutang ‘ta (sa community pantries) but the government should step in just to make sure nga ang makuha sa mga tawo (nga produkto) safe,” tataw ni Roldan.
Sumala sa DILG-XI official nga kini ang nag-unang rason kung nganong angay magbaton og permit ang mga naga-organisa og community pantries nga gimugna isip tabang sa labing nanginahanglan niining panahon sa pandemya.
RadyoMaN Kirby Manzon
