Davao City – Kinahanglan nga magbaton og permit gikan sa lokal nga gobyerno ang mga naga-organisa og mga community pantry, matud sa Department of Interior and Local Government (DILG)-XI.
Sa interbyu sa DXDC RMN Davao kang Alex Roldan, DILG-XI Regional Director, gibutyag niini nga bisan og libre lamang ma-avail sa tawo ang maong pagkaon o produkto, kinahanglan nga magbaton gihapon kini og regulasyon aron masigurong kini luwas ug mapatubag ang responsable panahon kung adunay mahitabong insidente.
“Ang problema man gud niana kay ang mga tao pag muingon na gani og pangayoan og permit, negatibo ang pagtan-aw. Nakalimot ‘ta nga kanang gipamutang nga mga pantry, pagkaon man gud na sa mga tawo, and who will be responsible in case kung dunay mahitabo?” saysay ni Roldan.
Gipasabot sa DILG-XI official nga responsibilidad sa gobyerno nga masigurong ma-regulate ang community pantries, diin gawas sa health and safety protocols batok Coronavirus Disease 2019 (COVID-19), kinahanglan usab nga masuta kung asa naggikan ang maong produkto ug kung luwas kini alang sa mga indibidwal nga mo-avail niini.
Nasayran nga nagsugod ang community pantry sa Maginhawa Street sa Quezon City, ug gisundog karon dinhi sa syudad sa Davao ug uban pang lugar sa nasud.
RadyoMaN Kirby Manzon
