Davao City – Hugtanong nagpahinumdum ang Department of Interior and Local Government (DILG-XI) sa tanang mga organizers sa community pantry nga makig-alayon sa tagsa-tagsa ka mga Local Government Units (LGU).
Sa interbyu sa DXDC RMN Davao kang Alex Roldan, DILG XI Regional Director, gibutyag niya aron malikayan ang nahitabo sa kaulohan nga adunay namatay nga senior citizen atol sa Charity event-Community Pantry sa aktres nga si Angel Locsin.
Gipasabot ni Roldan, kinahanglang adunay koordinasyon sa LGUs, ang susamang mga aktibidad aron makapadala og mga personahing motabang sa pagkontrola sa mga tawo ug mapatuman ang peace and order sa lugar.
“Kung pasagdan na nimo, magpatay ng mga tawo diha, mag-away pa. Kana siya ang gusto natong malikayan maong kinahanglang mu-koordinar sila and they strategized with the LGU,” sumala niini.
Giawhag ni Roldan ang tanang LGUs sa Davao Region nga suportahan ang community pantry ug dili na lisud-lisuron pa ang mga organizers sama sa pagkuha og permit, ang importante nga mapahibalo lamang kabahin niini aron matabangan sila diha sa pagtunol og mga tabang sa mga nanginahanglan karong panahon sa krisis.
RadyoMaN Aimee Guinita
