Davao City – Usa sa mga posibleng prayoridad nga lugar sa Pilipinas alang sa COVID-19 vaccination ang Davao Region.
Sa pakighinabi sa DXDC RMN Davao kang Department of the Interior and Local Government kun DILG XI Regional Director Alex Roldan, nakita karon sa gobyerno ang estado sa kaso sa COVID sa Davao region ilabi na sa Davao City diin base sa datos sa Department of Health kun DOH, anaa sa kapin pulo ka higayon nag Top 1 ang syudad sa adunay pinakadaghang bag-ong kaso sa COVID sa entero Pilipinas.
“It’s good to know nga ang Davao is one of the priority areas… probably kung naay vaccine, mauna ang Davao,” segun ni Roldan.
Dugang niini nga og muabot na ang vaccine, dili dayon tanan mabakunahan niini gumikan magsubay sila sa palisiya nga gihatag ni Presidente Rodrigo Duterte nga unahon kadtong marginalized sector sama sa mga miyembro sa 4Ps, mga anaa sa bulnerableng sektor apil na usab dinhi ang mga medical frontliners.
Apan sumala ni Roldan, han-ayon pa sa National Inter-Agency Task Force on COVID-19 ang palisiya kalabotan sa vaccination aron mamahimong hapsay ang pagpatuman sa pagpabakuna sa Pilipinas.
Hinuon sa ulahing update sa RMN Davao sa Department of Health kun DOH XI pinaagi kang Undersecretary Dr. Leopoldo Vega, wala pay COVID vaccine ang Pilipinas apan ginalauman kini sa unang quarter sa tuig 2021.
RadyoMaN Renz Barbarona
