Davao City – Gikatakdang magpagawas og advisory ang Department of the Interior and Local Government (DILG)-XI labot sa paggamit og firecrackers karong holiday season, sa Pasko ug Bag-ong Tuig.
Atol sa One Davao on COVID-19 Virtual Presser, gibutyag ni Alex Roldan, DILG-XI Regional Director nga kinahanglang ma-regulate ang paggamit og pabuto karong holiday season labi na sa ubang probinsya sa Davao Region nga nagtugot sa paggamit niini.
“Magpagawas ‘ta og advisory nga kung pwede i-control ang mga pabuto, ug kung pwede man magbutang og usa ka lugar nga didto lang nila himuon ang mga pagpabuto,” matud ni Roldan.
Gipanawagan ni Roldan ang mga munisipyo ug mga barangay nga walay firecracker ordinance nga magbaton na og regulasyon labot niini sama sa panawagan ni Presidente Rodrigo Duterte nga likayan ang delikadong pag selebrar sa holiday season.
Nasayran nga niadtong Mayor pa si Presidente Rodrigo Duterte sa Davao City nagbaton na og firecracker ban ang syudad subay sa Davao City Ordinance 060-02 nga gi-aprubahan sa konseho niadtong Oktubre 15, 2002.
RadyoMaN Kirby Manzon
