Davao City – Padayon ang ginahimong case build up sa Crime Investigation and Detection Group (CIDG) sa mga barangay officials nga nalambigit sa isyu sa Social Amelioration Program (SAP) distribution.
Sa interbyu sa DXDC RMN Davao kang Alex Roldan, Regional Director sa Department of Interior and Local Government (DILG), gibutyag niini nga adunay mga opisyales gikan dinhi sa syudad sa Davao ingon man sa ubang probinsya sa Davao Region ang nalambigit sa maong anomaliya.
Matud ni Roldan nga ayha i-endorso sa CIDG ang kaso, muagi una sa DILG ang reklamo aron ma-validate kini ayha imbestigahan.
“Kami mudawat mi sa mga reklamo pero ang pag build up sa kaso naa sa CIDG. Pero kami ang nag filter, tan-awon namo kung kining mga reklamoha ni medyo valid ba or basin medyo kwestyonable,” esplikar ni Roldan.
Nasayran nga daghanang indibidwal ang mireklamo human nga adunay nakadawat sa ayuda nga dili angayan ug adunay wala nakadawat ug gibarogang sila kwalipikado.
RadyoMaN Kirby Manzon
