Davao City- Duha ka adlaw una gisaulog ang kapaskuhan niadtong Disyembre 23, 2017, alas 9 sa buntag dihang nasunog ang NCCC Mall of Davao diin asa 38 ka call center agents sa SSI Call Center naapil og kapaig.
Gireklamo karon sa mga residente sa DBP Village sa Maa ug sa mga lumalabay ang sobra kabaho karon mugna sa hinungaw sa naabo nga mga baligya sa na-ugdaw nga NCCC Mall Davao.
Gikumpirma ni Barangay Maa kagawad Lyndon Banzon nga duha ka semana human sa nahitabo gipa-abot sa mga residente sa barangay ang ilang reklamo mahitungod sa dili masabtan nga baho gikan sa mall.
Human nadawat sa Barangay Council sa Maa ang mulo sa mga nanimuyo sa DBP Village gilayon nagpa-dala og suwat si kagawad Banzon sa DOH XI Director aron ipaabot ang kabaho sa Mall.
“Right after sa nahitabo niadtong Disyembre 24, 2017, right after usa ka semana or duha ka semana naa na gyod foul nga odor. Nagpadala mi og suwat sa regional director sa Department of Health ug copy furnished ug matud pa sa Talomo District health inspector nga January 17 nagbuhat sila og inspection didto sa NCCC mall,” sigun ni Banzon.
Ang DOH XI nagpagula dayon og direktiba niadtong Enero 17 ug gimandoan ang City Health Office aron aksyonan ang reklamo sa mga tawo.
Gilayon nagpahigayon og inspection ang Talomo District Health Office aron sutaon ang tinubdan sa baho nga hinungaw gikan sa grocerihan nga bahin sa nasunog nga mall.
Sigun ni kagawad Banzon, naglisod ang mga health inspectors sa pag-penetrate sa gambalay gumikan kahugmakon na kini ug delikado na kaayo kay basin mag-collapse lang og kalit ang building ug madisgrasya na hinoon sila.
Dugang sa kagawad nga niadtong Enero 19 gilayon nag-aksyon ang tagdumala sa NCCC Mall Davao aron masayran ang hinungdan sa sobra kabaho apan ang problema lang kahugmakon na ang gambalay ug risgo na sudlon.
Nagsuway og hangyo si kagawad Banson sa City Health Office nga i-disinfect ang lugar aron mawala ang kabaho sa NCCC apan milabad ang buhatan sa panglawas sa katarungan nga pribado matud pa ang mall.
Giingon ni Kagawad nga gitagalan lamang sa City Health Office hangtud karong adlawa ang tagdumala sa mall aron makagula og resulta sa ilang inspection alang sa hinanali nga aksyon sa lokal nga kagamhanan.
RadyoMaN Joel Viray
