Davao City – Gibuhian na sa Police Regional Office (PRO) XI ang abogadang na-aresto human kini makuhaan og daghang high powered firearms sa iyahang panimalay sa Blk. 11, Lot 20, Phase 2, Solariega Plantacion, Talomo, Davao City.
Sumala ni PRO-XI spokesperson Police Major Jason Baria nga nagpyansa ang dinakpan nga si Atty. Sitti Gilda Mahinay Sapie.
Sumala ni Baria nga gi-aresto ang abogada human positibong narekober ang mga armas ug mga bala sa pagsilbi sa search warrant sa paglapas sa kasong RA 10591 o Comprehensive Firearms and Ammunition Regulations Act of 2013 nga giisyu ni Judge Oscar Noel Jr. sa 11th Judicial Region, RTC Branch 38 Justice on Wheels, Alabel, Saranggani Province.
Matud ni Baria nga alang sa humanitarian consideration, gi-hospital arrest nalang kini human mireklamo nga nitaas matud pa ang blood pressure niini.
Human napasang-at sa mga awtoridad ngadto sa korte ang kaso batok sa maong abogada nakapyansa kini.
RadyoMaN Aimee Guinita
