Manila, Philippines – Nailigtas ng mga tauhan ng Southern Police District (SPD) ang isang Taiwanese national na biktima ng abduction sa Paranaque.
Sinabi ni SPD director Tomas Apolinario, bukod sa pag-rescue sa biktima, arestado rin ang tatlong suspect na Chinese national.
Kinilala ni Apolinario ang mga suspect na sina Zhao Xu 29, Cai Xing Bao 29 at Tia Xao Lin 30.
Sinabi pa ni Apolinario, ang biktima na si Lat Yun Chun, 38-anyos, ay nagkaroon ng utang na isang daang libong piso dahil sa pagsusugal, nang hindi makabayad sa pinagkakautangan, siya ay dinala ng mga suspect sa Room 202 ng Raymond Suites and Residences, sa Baclaran Paranaque.
Matapos nito, tinawagan ng mga suspect ang mga kamag-anak ng biktima sa Taiwan at pinatutubos ito ng isang daang libong piso.
Agad na humingi ng tulong ang mga kamag-anak sa Taipei Economic and Cultural Office (TECO) na siya naman humingi ng assistance sa Paranaque Police.
Agad nagkasa ng operasyon ang mga otoridad hanggang sa maaresto ang mga suspect.
Inaalam pa ng mga otoridad kung kasama sa isang malaking sindikato ng kidnap for ransom ang mga suspect.
