Bitbit ang order nga pirmado ni Sec. Arthur Tugade sa Department of Transportation (DOTr), nahidangat kagahapon sa rehiyonal nga buhatan sa DOTr Caraga si Usec. Analie Lontoc nga nagtudlo kang Dir. Abdul Fatah Gumaos isip Assistant Secretary sa Caraga ug Cordillera Administrative Region (CAR).
Pinasikad niini lauman nga mokalma na ang tensyon sulod sa DOTr Caraga tali nila ni Dir. Gumaos ug OIC regional director Engr. Nordy Plaza kinsa parehung nag-ilug nga mamahimung regional director sa buhatan.
Nasayran nga milungtad ug pipila ka oras ang close door meeting nila ni Gumaos ug Plaza kauban ni Usec. Lontoc sulod sa ilang buhatan.
Madumduman nga una nang namahayag si DOTr Usec. Reiner Yebre nga na-promote si Dir. Gumaos pagka-Assistant Secretary sa ahensya.
Gidawat usab ni Gumaos ang iyang appointment ug trabahoon ang gihatag nga tahas kaniya.
