Davao City – Sunod-sunod nga mga kalamidad ug katalagman ang nitatak sa tuig 2020 gawas sa gisagubang nga COVID-19 pandemic ug anaa sa 9 million ka tao ang apektado gikan sa pagbuto sa bulkan, linog ug mga bagyo.
Unang bulan pa lang sa tuig 2020 gisugat na ang Pilipinas sa pagalburuto sa bulkang Taal diin daghang mga pamilya ug mga kahayupan ang gipanghikling, bilyones ang nadamyos nga mga imprastraktura, turismo ug agrikultura.
Sa datos sa National Disaster Risk Reduction Management Council (NDRRMC) mobalor sa P45.5 billion ang damyos sa walo ka gikonserang pinakakusog nga natural disasters sa nasud sa tuig 2020 sugod sa Taal eruption sa bulan sa Enero, Typhoon Ambo niadtong Mayo, Magnitude 6.6. nga linog sa Masbate niadtong Agosto ug sa last quarter sa sunod-sunod nga mga bagyo ang nikuso-kuso sa nasud gikan kang Super Typhoon Rolly, pinakakusog nga bagyo sa kalibutan hangod kang Typhoon Ulysses nga gitawag nga most devastationg disaster of the year nga nibilin og P20.1 billion nga damyos ug nilunop sa mga kabalayan nga giagian sa bagyo.
Sumala ni City Disaster Risk Reduction and Management Office (CDRRMO) chief Alfredo Baluran, sa tanang kakulian sa 2020, labing bililhon ang pagpangandam aron malikayan nga adunay mga kinabuhing makalas ug sa ingon man mapugngan ang dakong kadaot.
Gitaho ni Baluran, sa entero tuig 2020 walay mga major damages nga natala sa dakbayan tungod sa kooperasyon sa publiko.
“Kaluy-an ta sa 2020 kay wala tay major nga calamities diri sa Davao City except sa pandemic,” sumala niini
Dili angay mukumpyansa ang publiko ug mutuman sa mga mando sa Local Government Units panahon sa mga emerhensiya.
“Atong ginaremind pirmi sa mga tao nga dapat naa gyuy go bag at any time kung naay emergency, linog, baha or sunog, ang mga important documents ug mga pagkaon nimo in 72 hours naa didto sa imong bag. Tan-awon nimo ang stability sa imong residence, i-check nimo ang imong balay batok linog ug andam dapat ang mga namuyo sa flood-prone ug landslide prone,” gibutyag ni Baluran.
Gawas sa mga sagunson nga mga kakulian sa tuig 2020, alang kang Baluran ang COVID-19 pandemic ang pinaka dakong hagit dili lang sa nasud apan sa tibuok kalibutan tungod sa dili makita nga kalaban.
Hinapos sa Enero nga gianunsyo ni Presidente Duterte ang unang kaso sa COVID-19, sukad niadtong Marso hangtod karon nagpatuman og lockdowns ug community quarantine aron mapugngan ang padayong pagkaylap sa virus.
As of December 30, 2020 mokabat sa 470K ang kumpirmadong kaso sa COVID-19 sa Pilipinas, 439K ang nakarekober ug 9K ang mga namatay.
RadyoMaN Aimee Guinita
