Davao City – Gitinguha karon sa Department of Education (DepEd-XI) nga sa sunod semana, pagasugdan na pormal ang mga mandatory emergency drills alang sa igong kahibalo sa mga tinun-an unsay angay buhaton panahon sa earthquake, bomb scenario, tsunami, baha, flashflood, landslide ug sunog.
Matud ni DepEd-XI Spokesperson Jenielito Atillo, ilang paningkamotan nga muarangkada na sa sunod semana ang mga drill sa tanang eskwelahan sa Region XI.
Segun ni Atillo, sulod karong semanaha, mahuman na og himo ang Memorandum Order aron mapadala dayon kini ngadto sa mga administrators sa mga tulonghaan aron kasugdan gilayon ang mga drills.
Matud ni Atillo, hugot na usab ang koordinasyon sa ilang buhatan uban sa mga ahensiya nga eksperto sa drill sama pananglitan sa Davao City Disaster Risk Reduction Management Office (DCDRRMO).
Tuyo lamang sa rehiyonal nga buhatan sa edukasyon nga walay dautang mahitabo ug nga maluwas gikan sa hulga sa ilang kinabuhi ang mga estudyante ug mga magtutudlo hatud sa linog ug daghan pang matang sa emerhensiya.
Ang pagmugna sa mahinungdanon nga programa ug preparasyon kontra kalamidad bunga kini sa mga linog sa miaging bulan kung diin adunay mga estudyante ug mga magtutudlo nga naangol ang uban nakabsan sa kinabuhi.
Gisugilon ni Atillo nga gitugyan na nila ang discretion sa pagpalit og ‘hard hats’ ngadto sa mga magtutudlo aron adunay magamit pangdepensa ang mga estudyante ug mga magtutudlo panahon nga muigo ang linog.
Gipaniguro ni Atillo nga dili mahimong ‘ningas kugon’ ang mga drills ug nga regular gayod kining pagahimoon sa matag semana diha sa mga eskwelahan.
RadyoMan Joel Viray
