Davao City – Mas taas na ang pagpakabana ug kahibalo sa mga tawo sa mga kabarangayan kung ang istoryahan mao ang pagpangandam kontra kalamidad ikumpara sa mga nanglabay nga katuigan.
Ang lig-on nga basehan niini mao ang aktibo nga partisipasyon sa katawhan mismo panahon adunay edukasyon ug orientation labot sa preparasyon sa kalamidad.
Matud ni Davao City Disaster Risk Reduction Management Council (CDRRMC) head Rodrigo Bustillo nga mao kini ang bunga sa ilang gipakusgan nga awareness campaign sa mga barangay sa siyudad.
Sumala ni Bustillo, nakadasig kanila sa pagpahigayon og disaster education seminar and orientation sa mga barangay mao ang nasinati nga bagyo, pagbaha, dahili sa yuta, linog ug uban pang kalamidad sa nasud.
Gilaraw karon ni Bustillo nga ila nang ilakip sa palisiya ang pag-obliga sa matag residente sa pag-apil sa drills sa kabarangayan aron ilang mas masayran ang angay buhatan kung actual na ang kalamidad.
Matag tuig, gipaniguro sa kabarangayan nga magahin gilayon ang 5% nga alokasyon alang sa disaster program nga gikuha gikan sa ilang internal revenue allotment matag tuig.
Kabahin ani, ang matag barangay nakamontar matud pa og emergency siren ug uban pang modernong kagamitan sama sa firetruck, ambulance, ug patrol boat tungod sa 5% nga alokasyon alang sa disaster.
Busa kampante si Bustillo nga kaya na luwason sa mga residente ang ilang mga kaugalingon gikan sa hulga sa kalamidad gumikan sa igong kahibalo ug kahimatngon.
RadyoMaN Joel Viray
