Davao City – Subay sa talaan sa Philippine Institute of Volcanology and Seismology (PhiVolcs), sentro kun epicenter sa nasinatiang Magnitude 5.6 nga linog mao ang lungsod sa Makilala, North Cotabato.
Ang maong linog nabati sa halos tibuok Mindanao diin dinhi sa Region XI, ang lungsod sa Matan-ao, Magsaysay sakop sa probinsiya sa Davao Del Sur ug ang siyudad sa Dabaw nakasinati og Intensity 4 nga pagtay-og.
Gikumpirma ni Office of Civil Defense (OCD-XI) Information Officer Leslie Francisco nga 28 ka aftershocks ang ilang na-record ug 4.9 Intensity maoy nitay-og sa Davao City alas-8:30 sa buntag.
Sumala ni Francisco, pipila ka pampublikong tulonghaan ug mga gambalay sa lokal nga kagamhanan sa Matan-ao ug Magsaysay, Davao Del Sur nangaliki kini gumikan sa epekto sa linog nga nikunsad didtong lugara.
Busa, ang kagamhanang probinsiya sa Davao del Sur nag-deklara og pag-suspende sa klase sa tanang pampubliko ug pribadong eskwelahan lakip na ang trabaho sa mga empleyado sa kagamhanang lokal.
Nunot sa nahitabong aftershocks, adunay mga empleyado sa pribadong kumpanya sa siyudad sa Dabaw ug mga estudyante sa Crossing Bayabas National High School sa Toril gilayong gihikling.
Segun ni Francisco, mokabat sa 175 ka mga estudyante gitabang sa Medic Team sa Central 911 human sila nangalipong, nangaluya ug nakuyapan gumikan sa kahadlok ug pagdinali-ay pagawas sa ilang mga classrooms.
Gisulti usab ni Davao City Disaster Risk Reduction Management Council (CDRRMC) Head Rodrigo Bustillo nga nakahatag og tumang kabalaka ug kahadlok ngadto sa katawhan ang mga ‘aftershocks’ hinoon walay mga gambalay nga na-damyos sa mga pagtay-og nga nahitabo.
Dugang usab ni Bustillo nga dapat nang seryosohon sa publiko ang ginatudlo nga mga pamaagi kontra disasters sama sa pagpahigayon og regular, periodic earthquake drills aron sa ingon dili mameligro ang kinabuhi panahon sa dili matagna nga mga katalagman, emerhensiya ug kalamidad.
Dugang ni Bustillo nga dili na luwas ang siyudad diha sa mga linog samot na nga adunay lima ka mga Fault System nga nadiskubrehan naglatas diha sa 60 ka mga barangay sa dakbayan sa Dabaw.
Gi-awhag usab ni Bustillo ang publiko nga dili mag-panic hinonoa, himoon ang Standard Operating Procedure kun safety protocol nga ‘duck, cover and hold’ ug dili gilayon mokaratil og dagan, inay paabotong mohunong ang linog aron kalikayan ang stampede kun kaguliyang paingon sa mga pultahan ug exits ug sa ingon, kalikayang madisgrasya ang kinabuhi.
RadyoMaN Joel Viray
