Davao City – Ang kakulang sa saktong edukasyon ang hinungdan nganong padayong nasinati ang diskriminasyon sa mga tawo nga natakbuyan sa balatian nga HIV-AIDS.
Sa interbyu kang Alliance Against Aids in Mindanao Convenor Alma Mondragon, giingon niya nga daghan sa mga biktima sa HIV-AIDS gitamay ug gisalikway sa katawhan nga walay hanaw sa maong sakit.
Dili matago ang kamatooran nga nakasinati og social stigma o diskriminasyon ang mga nagbaton sa HIV-AIDS ning panahon karon, segun ni Mondragon.
Mao kini ang rason nganong daghan sa mga ‘Persons with HIV-AIDS’ maulaw magpa-medical examination gumikan sa kabalaka nga basin isalikway sila sa katilingban ug sa ilang pamilya ugaling mahibaloan ang ilang sakit.
Usa kini sa bug-at nga hinungdan nganong padayong wala mapugngi ang pagkuyanap sa maong klase sa balatian.
Hinoon sa pangagpas ni Mondragon, panagsa ra nga makasinate og bullying o harassment ang mga nagbaton ning maong kondisyon-medikal.
Busa, apelar ni Mondragon ngadto sa publiko nga kung mahimo likayan ang pagtenir og ‘multiple partners’ diha sa pakighilawas ug likayan ang sexual practice nga ‘Men Having Sex with Men’ kun MSM aron dili maigo sa diskriminasyon susama sa na-eksperyensyahan sa ubang tawong nataptan niini.
RadyoMaN Joel Viray
