Davao City – Dili lang paghulma sa maayong kaugmaon pinaagi sa edukasyon ang tahas sa mga magtutudlo apan lakip na usab ang pagdisiplina sanglit sila ang ikaduhang gikunsiderang ginikanan sa mga kabataan.
Gibutyag ni Davao Prof. Randy Ponteras nga responsibilidad sa mga magtutudlo ang pag-disiplina sa ilang mga estudyante mientras ang mga kabataan anaa sa ilang poder aron sa pag-atiman ug pag-amping.
Gisulti ni Ponteras nga ang pagdisiplina kabahin sa curriculum sa edukasyon nga gipatuman diha sa mga eskwelahan kay dili lang ang kahibalo ang gihulma apan lakip na ang pagka responsable ug maayong pamatasan aron maseguro nga mapuslan ug mamahimong produktibo ang mga kabataan ini’g kadako nila.
Gipasabot ni Ponteras nga ang pagdisiplina sa usa ka estudyante dili kinahanglang gamitan og bayolente nga pamaagi sama sa bunal, paglabay og eraser, chalk ug uban aron dili mabiktima sa bullying ang usa ka bata.
Matawag lang nga ‘teacher bullying’ kung ang magtutudlo dili makapugong sa kaugalingon ug madapatan gayod ang iyang estudyante nga magpabadlong kun magpasaway kaniya.
Dugang ni Ponteras nga ang magtutudlo nga mangdapat samtang nagadisiplina sa iyang mga estudyante may tugbang kasong atubangon ug kung mahukmang guilty, hayan pila ka bulan ug tuig siya nga ma preso.
Usa sa epektibong pamaagi sa pagdisiplina sa bata mao ang pagpadala og abiso ngadto sa mga ginikanan sa matuod nga estado sa pagtoon sa ilang mga anak ug dili ang pagsilot pinaagi sa pisikal nga pamaagi.
Dugang ni Ponteras nga nagkinahanglan og igong proteksiyon ang mga magtutudlo aron sa ingon dili sila bastang mahasi ug mahulga nga kasohan sa mga ginikanan tungod sa ilang pagdisiplina sa mga kabataan.
RadyoMan Joel Viray
