Dumalinao, Zamboanga del Sur – Dakpan ang usa ka engineer ug ang laing usa pa ka indibidwal sa buy bust operation.
Ala una sa hapon kaniadtong Dominggo, usa ka hiniusang buy bust operation ang gipahigayon sa PDEA-9, Zamboanga Sibugay PPO-Drugs Enforcement Unit ug mga personahe sa Dumalinao MPS didto sa Purok Nangka, Brgy. Anonang, Dumalinao, Zamboanga del Sur.
Dakpan sa maong operasyon ang usa ka engineer nga nailang si MOHALIDEN MOTALIB SINGH SR, 46 anyos, minyo ug kasamtangang nagtrabaho isip Engineer II sa Zambo. Del Sur 2nd District Engineer Office, nga nakabase sa lungsod sa Guipos, ug residente sa Poblacion, Guipos, Zamboanga del Sur.
Nakumpiska gikan sa suspek ang duha ka pakete sa gitoohang shabu nga mokabat sa kapin kon kulang 6 ka gramos ug gibana-banang mobalor sa 40,800 pesos ug ang usa ka libo nga kwarta nga gigamit isip marked money.
Si Engineer Singh ang gidala sa PDEA office ning syudad sa Pagadian ug gipasakaan na sa tukmang kaso.
Pagka alas 3:15 sa hapon sa mao gihapon nga dapit, dakpan usab pinaagi sa buy bust operation ang 26 anyos nga nagngalang CEIGRYSS SAINT P CANETE kinsa taga Purok Nangka, Brgy. Anonang, Dumalinao.
Mga operatiba sa Dumalinao MPS and Zamboanga delNorte Provincial Mobile Force Company ang mipahigayon sa nasangpit nga operasyon.
Nakumpiska atol sa operasyon ang duha ka pakete sa gitoohang shabu nga gibana-banang mokantidad sa Php 2,870.00 ug lakip ang buy bust money.
Mag-atubang sa kasong paglapas sa RA 9165 kon ang mas nailang Comprehensive Dangerous Drugs Act of 2002 ang mga dinakpan.
