Davao City- Laumang maluag-luagan ang dagan sa trapiko karong adlawa dinhi sa syudad sa Dabaw tungod paga-abrihan na ang Carlos P. Garcia Highway (Diversion Road) sugod karong alas singko sa buntag.
Sumala sa impormasyon nga gipagula kagahapong adlawa sa Davao City Information Office kun CIO, paga-abrihan na ang Diversion Road ngadto sa one way traffic lang, gikan Bangkal padulong sa Panacan, South ngadto na sa Norte nga bahin ang pwede lang maka-agi sa nasangpit nga dalan diin sugod alas singko sa buntag karong adlawa kutob alas 8 unyang gabii, mamahimo ng makaagi ang mga sakyanan.
Dugang sa CIO, padayon pa gihapon ang ginapahigayong clearing operation sa Department of Public Works and Highways (DPWH-XI) sa naapektuhan sa landslide sa nasangpit nga bahin sa highway.
Sa pikas bahin, nibyahe kagahapon sa hapon ang pulo ka mga bus nga gi-andam sa lokal nga gobyerno aron muhatod sa mga pasahero nga naapektuhan sa bumper to bumper nga trapiko sa kadalanan sa dakabayn ilabi na sa south area.
Sa interview sa DXDC RMN Davao kang Traffic Enforcer Assistant Supervisor Tamayo, gisulti niini nga nagsugod kagahapon sa hapon ang pagbyahe sa ubang mga bus nga gimungtar sa may Quezon Park, sa may dalang san pedro gani ubay-ubay ka mga dabawenyo ang misakay apan nibayad sila sa standard fare rates.
RadyoMan Renz Barbarona
