Kapin sa 30 ka mga pamilya sa Diversion Road sa Barangay Langub, Ma-a gi relocate ngadto sa Los Amigos relocation site human ang clearing operation sa gipahigayong road widening sa Department of Public Works and Highways XI.
Matag apektado nga pamilya adunay nadawat nga financial assistance gikan sa DPWH XI depende sa gidak-on sa ilang panimalay nga naigo sa clearing operation.
Sakit man sa buot sa mga residente nga biyaan ang ilang gipuy-an sa Old Dumpsite area apan kinahanglan nga mubalhin na sila alang sa seguridad sa ilang pamilya tungod sa pag dahili sa yuta.
“Halos matag gabii gani gamay ra kaayo mi og tulog kay ang akong huna-huna murag diri gyod ba. Sayang gud (ang among balay) unya unsahon man, asa man ang atoang mas palabihon ang kinabuhi o kanang simbako madisgrasya ka. Pasalamat lang gihapon ko nga ang gobyerno wala nagpabaya sa amoa.” segun ni Pablo Bernaldo, usa sa mga residente nga nakapuyo duol sa dump site.
Gipaniguro ni Kapitan Esmeraldo Pamat sa Barangay Langub nga makabalhin na sa relocation site ang mga residente ilabina nga adunay dakong bahin sa bakilid sa Diversion Road nga posibleng mudahili tungod sa nagpadayong widening sa maong lugar.
“Karong adlawa kining mga tawo dinhi dapat wala na gyod ni sila. Ang uban pud dinhi nga pamilya, kato ilang mga bana mag hinay-hinay na sila og guba (sa ilang balay) kay dinhi dapit na side (sa ilang gipuy-an) i-rehab man pud ni siya,” matod sa kapitan.
Gitutukan usab sa mga personahe sa City Social Services and Development Office ang mga evacuees aron maatiman ang ilang psychological ug emotional nga kahimtang gumikan sa pugsanong pagbalhin kanila ngadto sa Los Amigos Relocation Site.
“Kay ang purpose nato is rescue man for their safety, so ang amo is gihupay gyod namo sila, gi hinay-hinay namo unsay outcome kay risky gyod kaayo para sa ilaha kung magpabilin sila diri while ongoing ang project delikado gyod sila kay prone kaayo sila sa landslide.” segun ni Norma Gumapo sa CSSDO.
Gibutyag usab ni Dionisio Abude, hepe sa City Transport and Traffic Management Office nga magdepende ang ilang pag reroute sa mga sakyanan kun kanus a mahuman sa DPWH ang pagkabkab sa yuta nga nagadahili sa Diversion Road.
RadyoMan Erin Lumosbog
