Davao City – Adunay tulo ka mga aspeto ang debate karon sa proposed Divorce Law dinhi sa nasud: Ang aspetong sosyal, religious ug pulitikal.
Sa interbyu sa programang ‘Straight to the Point,’ gitataw ni Ateneo de Davao University (ADDU) assistant professor of philosophy Dr. Christopher Ryan Maboloc nga posibleng makonsidera nga kritikal ang sosyal diin komon karon ang mga insidenteng pagpang-abuso ngadto sa kababayen-an gani maglisod kini og sulbad sa aspetong relihiyon.
“Tungod kay pre-dominantly Catholic kita diin more than 85% sa mga Pilipino Catholic, dako gayud ang impluwensiya sa simbahan ug ang simbahan against sa divorce,” segun niini.
Matud ni Maboloc, dili angay pugngan ang usa ka tawo kung gusto niini og kagawasan alang sa kaayuhan sa iyang kaugalingon ingon man sa iyang mga anak.
“For instance, kon dili na ma-correct psychologically ang usa ka lalaki sa pagpangabuso diha sa iyang pamilya, gikinahanglang mo-intervenir kun magpatunga ang estado ug ang pamilya sa babaye for instance para pod maprotekhan ang well-being sa mga bata ug apil na pud sa mga babaye,” saysay niini.
RadyoMaN Jason Amisola
