Davao City – Gibatikos karon sa National Center for Commuter Safety and Protection ang mga nagsupak sa Motorcycle Crime Prevention Act diin gimando nga butangan og dagkung doble nga plaka ang tanang mga motorsiklo.
Gipuna ni NCCSP President Elvira Medina ang mga mibabag kay wala pa gani nila makita ang tinuod itsura ug gidak-on sa plaka, nagbandera dayon sila og dili mao nga ispesipikasyon sa plaka.
Gisaway ni Medina ang mga organisasyon sa mga motorsiklo kay nagpataka lamang sila og dala og plaka sa ilang protesta bisan og dili mao diin usa kini ka matang sa paglingla sa publiko.
Gitino ni Medina ang tumong sa balaud mao ang pagluwas og kinabuhi sa mga motorista ug sa commuters gikan sa disgrasya ug sa mga kriminal.
Gani gipalanog ni Medina nga ang tumong sa bag-ong balaud mao ang pagsanta sa disgrasya ug paglutos ug paggukod sa riding-in-tandem ug sa mga kriminal dili sama sa pasangil sa mga misupak nga pagpakaulaw kini sa mga motorista.
Gihagit ni Medina ang mga kritiko nga suportahan ang doble plaka law kung naghunahuna sila sa pagsalba sa kinabuhi sa daghang mga commuter gikan sa disgrasya ug sa kamot sa mga kriminal.
Kung si Medina ang pasultihon, kulang pa ang P50,000 nga multa aron mabalik ang kinabuhi sa tawo nga makutlo unya tungod sa disgrasya ug sa mga kriminal.
RadyoMaN Joel Viray
