DOH-7 mitala og duha ka cholera outbreak diin usa ang patay

53
Usa ang kompirmadong patay sa duha ka Cholera Outbreak nga namonitor sa Regional Epidemiology and Surveillance Unit (RESU) sa Department of Health (DOH)-7.

Ang maong mga outbreak natala sa Badjao community sa Brgy. Totolan, lungsod sa Dauis, lalawigan sa Bohol ug sa isla sa Carnaza, lungsod sa Daanbantayan, lalawigan sa Sugbo duha ka semana na ang nakalabay.

Matod ni Renan Cimafranca sa RESU-7, nga kontrolado na hinoon ang duha ka outbreak sa cholera, diin didto sa Dauis sa Bohol, miabot sa 78 ka mga tawo ang natapdan sa maong sakit, duha ang kumpirmado sa laboratory test samtang usa ang patay.

Samtang didto sa lungsod sa Daanbantaya, misaka ngadto sa 129 ang natalang kaso diin 11 ang na-admit sa tambalanan ug tulo ang nakumpirmar sa laboratory test.

Lakip sa mga sintomas nga nasinati sa mga pasyente, mao ang pagpanakit sa tiyan, pagsuka-suka ug kalibanga.

Nasayran nga nagpositibo sa fecal coliform ang mga tinubdan sa tubig sa duha ka lugar nga gikan sa mga atabay, pribado nga water source ug mga container sa tubig nga gibaligya.

Mapasalamaton hinoon ang ahensiya sa dali nga pag-responde sa local health unit sa maong mga lungsod, hinungdan nga dali nilang nakontrolar ang sitwasyon ug wala modaghan ang casualty sa insidente.

Awhag ni Cimafranca sa mga naasoyng komunidad, nga adto lang mopalit ug tubig sa mga reliable water source, apan kun way ikapalit, angay nga pabukalan daan ang tubig o di kaha sagulan ug disinfectant aron sa pagserguro nga luwas kining imnon.
Niapod-apod na sab ang ahensiya ug mga Jerrycans ug aqua tabs ngadto sa mga apektadong residente ug mga disinfectant.


Facebook Comments