Bilang kabahin sang kampanya sa HIV-AIDS awareness, may ginpahamtang nga condom station sa PHINMA University of Iloilo, University of the Philippines ukon UP diri sa syudad sang Iloilo kag Miag-ao kag sa West Visayas State University.
Ginpahayag ni Department of Health (DOH) 6 STI/HIV and AIDS program coordinator Adrian Hort Ramos nga ang pagpahamtang sang condom stations ang isa man sa mga stratehiya sang DOH agud mapunggan ukon makontrol ang nagataas nga kaso sang nasambit nga infection ukon sakit.
Gin-athag ni Ramos nga wala nagapanagtag sang condom sa bisan kay sin-o lang ang condom stations.
Suno sa iya , ginpahamtang ang mga condom stations sa opisina sang student organizations ukon sa clinic sang buluthuan kon sa diin, may mga gin-assign nga personnel nga maga-educate kag magapatigayon anay sang counselling sa mga nagakinahanglan sang condom.
Sa datus sang Department of Health, yara sa ikalima nga pwesto ang Western Visayas sa may pinakamadamo nga kaso sang HIV/AIDS nga nagalab-ot sa 2,946 ka kaso halin sang 1986 kon sa diin may ang isa ka kaso kada 9 hour sa Visayas.
Samtang, may pinakamadamo naman nga kaso sang HIV sa age group nga 25-34 years old kag nagapangaduha ang age group nga 15-24 years old age .
(photo from web)
