TACLOBAN CITY – Nababaraka an Dept. Of Health Region 8 kay may mga nahadlok na pagpaturok hin magkadurudilain nga vaccination nga makakaupay unta ha panlawas han mga bata.
Nahadlok naman gud an mulopyo pagpaturok tungod han issue han Dengvaxia vaccine nga pira na nga bata an gin-aaligar namatay tungod hini nga medisina.
Sumala kan DOH Region 8 Information Officer John Paul Roca, may mga nalikay na nga akseptaron iton serbisyo nga ginhahatag han DOH.
“May mga nanay nga hesitant nga maging recipient han services han Dept. Of Health like an deworming, an iba nga immunization, and then an aton latest nga ginpanhatag yana an iron and folic acid supplementation… gintatagan namon hira [kag-anak] hin information kun ano an epekto ngan kaupayan hini to their children.”
Pagklaro ni Roca nga waray mahiapil an Region 8 han katagi han Dengvaxia vaccine pero may 2 nga recipient han Dengvaxia tikang ha Bulacan ngan Pampanga nga aanhi na nag-uukoy ha Rehiyon ngan padayon iton monitoring ha ira han DOH.
Pahimatngon han tagapagyakan.
“Gusto la namon ipasabot ha mga parents nga ayaw kamo kahadlok pag-receive hin services tikang ha DOH kasi proven naman gud ini for how many years ngan may maupay ini nga epekto ha usa nga tawo.”
