DOH-XI: Kapin 80% COVID cases sa rehiyon asymptomatic

29

Davao City – Mokabat sa 88% ka kaso sa Coronavirus Disease 2019 (COVID-19) sa Davao Region, ang gikonsiderang ‘asymptomatic’ kon wala nakasinati og simtomas sa virus.

Atol sa Department of Health (DOH)-XI Virtual Presser, gibutyag ni Dr. Raquel Montejo, Operation Chief of the COVID-19 Response, DOH – Davao Center for Health Development, sugod June 14, 2021, anaa sa 5,642 COVID-19 cases (88%) ang asymptomatic sa Davao Region.


Samtang sa maong adlaw, anaa lamang sa 9.6% (615) ang mild cases, 2.2% (138) ang severe cases ug 0.2% (14) ang critical cases.

Gibutyag ni Montejo, adunay tulo ka gitudlong hinungdan nganong mas taas ang natalang asymptomatic sa rehiyon diin una mao ang ‘recall’ o ang paghinumdom sa pasyente nga wala kini nagbaton og simtomas sa COVID-19. Ikaduha, ang wala pagtug-an sa tinuod o ang pag-ingon nga siya asymptomatic bisan og aduna kini nasinatiang simtomas.

“Number three is which is ang pinakalabaw sa tanan is ang immunity sa isa ka tao. So, kung kusog ang immunity sa isa ka tao, usually wala ni silay bation (asymptomatic),” butyag ni Montejo.

Nagpasalamat gihapon ang health official nga ang asymptomatic cases dili maoy hinungdan sa pagkapuno sa Intensive Care Units (ICUs) sa mga hospital diin pwede lamang sila nga mabutang sa Temporary Treatment and Monitoring Facilities (TTMFs) samtang naghulat nga makarekober gikan sa COVID-19.



RadyoMaN Kirby Manzon

Facebook Comments