Davao City – Wala pay gihatag nga dugang impormasyon ang Department of Health (DoH)-XI kalabot sa identity sa gikonsiderang Person Under Investigation (PUI) sa 2019 Novel Coronavirus (nCoV).
Sa interbyu sa DXDC RMN Davao kang Dr. Annabelle Yumang, DOH-XI Regional Director, gisaysay niini nga ginahulat pa ang resulta sa gisumiteng sample gikan sa maong PUI.
“Naa na tay usa (PUI) karon nga ginamonitor gihapon. Dili pa namo ma-disclose ang iyang identity kay wala pa may official laboratory result,” tataw ni Yumang.
Sa pagkakaron, wala pay kumpirmadong kaso sa nCoV sa Davao region sumala sa DoH.
Sa gipagawas nga situation report sa DOH kagahapong adlawa, Enero 29, 2020, gikan 27, 23 na lang PUI human nag negatibo ang 4 sa nCoV.
Dugang niini, 17 ang suspected cases ang natala sa National Capital Region (NCR), 1 sa Western Visayas, 1 sa Mimaropa, 1 sa Eastern Visayas, 2 sa Central Visayas ug 1 sa Davao region.
RadyoMaN Kirby Manzon
